«Елімізде діни ахуал тұрақты. Дініміздің жанашыры Елбасының игі бастамасымен көптеген зәулім мешіттер бой көтеруде. 2300-ден астам мешіт халықтың бірлігі мен ынтымағы, ізгілік пен имандылық жолында қызмет етуде», – деді Бас мүфти.

Ресми қабылдауда Жанболат Аятбекұлы Қазақстан мұсылмандары діни басқармасының бастамасымен жүзеге асып жатқан ізгі істер мен сауапты жұмыстар туралы хабардар екенін айта келе: «Сіздерден алатын үлгі мен тәжірибе көп. Осы бағытта ортақ мақсат үшін екі ел діндарларының байланысын күшейтуіміз қажет», – деді.

Басқосуда Бас мүфти Алтай қазақтарына, имам-молдарына онлайн дәріс өткізу қажеттігін айтты. Бұл ұсынысқа оң пікірін білдірген Ж.Аятбекұлы Діни басқарма тарапынан уағызшылар тобын Алтай аймағына жіберу туралы өтініш білдірді.

Ержан қажы Малғажыұлы бұл өтінішті қабыл алып, сонымен қатар шеттегі қандастарымызды қажетті кітаптармен қамтамасыз етуге дайын екенін жеткізді.

Алтай Республикасынан келген дін өкілдерінің ресми сапары аясында ертең екі елдің рухани саладағы өзара ынтымақтастығын арттыру бағытында меморандум қабылданбақ.

muslim.kz