Рамазан айының қарсаңында ҚМДБ Ғұлама кеңесінің мүшелері, елімізге белгілі исламтанушы-ғалымдар мен пәтуа мамандары тікелей эфирде көпшіліктің сауалдарына жауап берді.

«Рамазанға дайындық» онлайн сұрақ-жауап жобасында ҚМДБ Шариғат және пәтуа бөлімінің меңгерушісі Сансызбай Құрбанұлы мен оның орынбасары Хасан Аманқұл, Діни білім және кадр даярлау бөлімінің меңгерушісі Смайыл Сейтбеков, Ғұламалар кеңесінің хатшысы Батыржан Мансұров, сондай-ақ пәтуа мамандары Бауыржан Әбдуәлі мен Медет Құрмашұлына оқырмандар тарапынан оразаға қатысты сұрақтар қойылды. Онлайн бағдарламаны тележурналист Еркін Шәкірұлы жүргізді.

Бас-аяғы қырыққа жуық сұрақ қойылса, олардың қатарында жыл сайын әсіресе, бірінші рет ораза ұстағалы отырған жамағаттың «Түкірік жұтуға бола ма?», «Тіс жұлдыруға бола ма?», «Дәрет алып жатып су жұтып қойса, ораза бұзыла ма?» деген сынды сұрақтар мен заман ағымына қарай туындаған «Екпе егу оразаны бұза ма?», «ПЦР-тест, анализ, қан тапсыру оразаны бұза ма?» секілді сауалдар қойылып, дін мамандары тұшымды жауап берді.