Алланың қалауымен, Мұхаррам айының келуімен хижра бойынша жаңа 1441 жыл басталды. Хижра — Пайғамбарымыз Мұхаммедтің (ﷺ) Меккеден Мединеге қоныс аударуы. Ол 622 жылы орын алған. Бұл ислам тарихындағы маңызды дата, бұл оқиға ислам тарихының басталған уақыты, сондықтан да мұсылман жыл санауы осы датадан басталады. 

Қасиетті Мұхаррам Ережеп, Зұл-Қағда және Зұл-Хижжа айлары сияқты жанжал мен соғыстарға тыйым салынған ай. Құранда былай айтылған: «Расында Алланың қасында көктер мен жерді жаратқалы Алланың Кітабындағы айлардың саны он екі. Бұлардан төртеуі құрметті айлар» (9:36). Ал хадисте былай делінген: «Жыл он екі айдан тұрады, бұлардың төртеуі құрметті айлар, үшеуі қатарынан келеді: Зұл-Қағда, Зұл-хижжа және Мұхаррам, ал (төртінші ай) Ережеп Жумада мен  Шағбан айларының ортасында орналасқан» (әл-Бұхари). Аталмыш айда ерекше құлшылық ету қарастырылмаған. Басқа кездегі сияқты игі амалдар жасауға тырысу, құлшылықты арттыру, намаздарды толықтыру, садақа беру, Құран оқу,  мінезді көркейту, күнә жасаудан аулақ болу. Сондай-ақ, кез-келген күні кез-келген мөлшерде ораза ұстау сүннет болып табылады: «Рамазан айынан кейінгі жақсы ораза – Алланың айы Мұхаррамда ораза ұстау» (Мүслім).

Мұхаррам айының ең мәнді күні, Мұхаррам айының 10-шы жұлдызы немесе 30-шы қыркүйек -  Ашура Күні. Ибн Аббас (р.а.) былай айтқан: «Пайғамбарымыз (ﷺ) Мединеге келіп, яһудилердің Ашура күні ораза ұстап жүргенін көріп: «Бұл не?» - деп  сұрайды. Олар былай жауап береді: «Бұл — қайырлы күн, осы күні Алла Ысраил ұлдарын жаулардан құтқарған, сондықтан Мұса (ғ.с.) осы күні ораза ұстайтын болған». Бұған Пайғамбарымыз (ﷺ): «Сендерге қарағанда, менің Мұсада (ғ.с.) көбірек құқым бар!» - деп жауап беріп, осы күні өзі де ораза ұстап, басқаларға да ораза ұстауға бұйырған екен». Айша анамыз (р.а.) былай айтқан: «Жәһилиәт заманында құрайыштар Ашура күні ораза ұстаған әрі Алла Елшісі (ﷺ) де ораза тұтқан. Ол Мединеге келген соң да ораза ұстауын тоқтатпаған, басқаларға да ораза ұстауға бұйырған. Рамазан айында ораза ұстау парыз етілген күннен бастап, ол Ашура күні ораза ұстауын доғарған екен. Сол кезден бастап Ашура күні ораза ұстағысы келгендер – ұстап, ұстағылары келмегендер - ұстамаған».

Ашура Күні ораза ұстау Алла Елшісінің (ﷺ) сүннеті болып табылады. Ибн Аббас (р.а.) былай айтқан: «Мен Алла Елшісін (ﷺ) Ашура күні және Рамазан айында ораза ұстауға сондай құштар болғанын ешқашан көрмеп едім (әл-Бұхари). Ең тәуірлеуі оразаны  Мұхаррам айының 9-шы және  10-шы немесе  10-шы және 11-ші күндері  ұстау болып табылады.  

asyldin.kz