Жанұяда ата-анаға ұлы қарау керек пе әлде қызы қарауы керек пе? Әйел ерінің ата-анасын қарауға міндетті ме?

Негізі, балалар ата-аналарын лайықты түрде күтіп, оларға жақсы қарауы керек, өйткені олардың кішкене күнінде ата-анасы да оларға жақсы қарады емес пе? Алайда балаларының өз алдарына отбасы болатын болса, онда ата-анаға кімнің қарауы керек?

Ұлдар өздерінің отбасылық жағдайына қарамастан ата-аналарын күтіп, бағуға міндетті. Ата-аналар да өз тарапынан қолдарынан келгенше үй шаруасына көмектесіп, тамақ пісіру, кір жуу сияқты істерге қолғабыс етіп жатады. Дегенмен, әйел адам ерінің ата-анасына қарауға міндетті емес, алайда бұл жерде үй-ішіндегі үйлесімділік, тыныштық мәселесіне тоқталар болсақ, онда, шүбәсіз, отбасы мүшелері арасындағы қарым-қатынасты жақсарту мақсатында және отбасы амандығын сақтап қалу үшін әйелдің өз ерінің ата-анасына дұрыс қарағаны абзал. Алайда әйелі белгілі бір себептермен күйеуінің ата-анасына қарай алмайтын болса, онда баласы ата-анасын күту үшін қызметші жалдауы қажет, өйткені бұл жағдайда оның мойнынан ата-анасына қарау міндеттілігі түспейді. Сәйкесінше, барлық қажетті шығындарды ол өзі төлеуі керек.   

Тұрмыстағы қыздары да ата-аналарына қарауы тиіс, бірақ қыздардың мүмкіндіктері ұлдарға қарағанда шектеулі болғандықтан, олар ата-анасына ұлдармен тең деңгейде қарай алмайды.

Ендеше, қартайған ата-ананың қызы да, ұлы да болған жағдайда, ата-ананы бағып-қағу жауапкершілігі олардың ұлдарына түседі, бірақ әлдебір себептермен ұлдары ата-анасына қарай алмайтын болса, онда қыздары күйеулерімен ақылдасып, ата-ананы қарауды өз мойындарына алады.

asyldin.kz