Қырғызстан президенті Сооронбай Жээнбеков республикада мектептерден мешіттер көп деп жүретін БАҚ өкілдерінің мәлімдемесіне түсініктеме беруге бел буды.

Мемлекет басшысының айтуына қарағанда, Қырғызстанда расымен мектептерге қарағанда мешіттердің көп болуы – жақсы көрсеткіш.

«Мешіттер көп болса, ар-ұжданды балалар көп болады. Ал медреселер көп болса, ұжданды жастарымыз көп болады», - деп атап өткен Қырғызстан көшбасшысы.

Дегенмен, оның пайымдауынша, елде экстремизм мен лаңкестік әрекеттерге жол бермес үшін, әрбір діни мекемелердің үстінен мемлекеттік бақылау болу қажет.

«Біз ата-бабамыздан бері келе жатқан дәстүрлі дінімізді ұстануымыз тиіс», - деп атап өтті С.Жээнбеков.

Айта кету керек, қолда бар зерттеулерге сәйкес, қазіргі таңда Қырғызстанда мектептер тапшылығы қатты алаңдатуда – республикада мектеп жасындағы 1 миллион 175 мың 780 бала бар, ал барлық мектептердегі бала сыйымдылығы тек 600 мың ғана.

Мектеп оқушылары 3 немесе 4 ауысыммен оқуға мәжбүр болуда, ал сыныптағы оқушылардың саны 55-ке жетуде.

asyldin.kz