Мекке толықтай мұсылмандардың қолына өт- кеннен кейін Исламның бас дұшпаны Әбу Жәһилдің баласы Икриманы Пайғамбарымыз (саллаллаһу аләйһи уә сәлләм) өлім жазасына кескендіктен ол бас сауғалап Йеменге қашты. Алайда оның әйелі Үммү Хаким болса мұсылмандықты қабылдап, әрі күйеуі Икри- маны кешіруді Пайғамбарымыздан өтінген еді.

Пайғамбарымыз оны кешіргендігін білдіргенде, Үммү Хаким дереу күйеуін іздеп жолға шықты. Теңіз жағасындағы бір кемеде мұсылман капитанымен сөйлесіп тұрған жерінен Икриманы тапты. Капитан оған:

– «Лә иләһа иллаллаһ, Мұхаммед расулаллаһ» деп айтып имансыздықтан біржолата арылсаңшы, – деді. Икрима:

– Мен онсыз да соны айтпағандығым үшін қашып кеткем жоқ па?! – деп қарсылық білдірді. Сол кезде қастарына жақындаған Икриманың әйелі:

– Мен қазір адамдардың ең абзалының, ең жақсысының қасынан келе жатырмын. Пайғамбарымызбен (саллаллаһу аләйһи уә сәлләм) сөйлестім, сені кешіріп, саған берген өлім жазасын да қайтып алды. Саған ендігі жерде қорған болатындығын айтты. Өзіңе титтей жаның ашыса, жүр енді,- деп ізгі хабарды жеткізді. Екеуі бірге жолға шықты. Жолда қонақтаған бір жерде Икрима әйелімен жақындасқысы келді. Алайда әйелі оған қарсы болып:

– Жоқ болмайды, – деді, – мен мұсылманмын, ал сен кәпірсің! Икрима: – Сені маған жақындатпаған сенім расында да маңызды болса керек, – деді. Икрима Меккеге жақындағанда Аллаһ елшісі сахабаларына қарап:

– Әбу Жаһилдің баласы Икрима мүмин және мұһажир кейіпте сіздерге келе жатыр. Әкесін сөге көрмеңіздер! Өйткені айтылған сөгіс өліге жетпеген- мен тіріге жетеді, – деп ескертті. Пайғамбарымыз Икриманы көргенде аса бір қуанышпен қарсы алып, ерекше ілтипат көрсетті. Икрима келген бойда:

– Әй, Мұхаммед! Сен мені қандай дінге шақырасың? – деп сұрады.

– Алладан басқа құдай жоқтығына және менің Аллаһтың құлы әрі елшісі екендігіме сенуге, сондай- ақ намаз оқуға, зекет беруге шақырамын, – деп жауап берді пайғамбарымыз. Сонда Икрима:

 – Алла атымен ант етейін, сен шынында да халықты тек қана жақсылыққа шақырасың. Сен пайғамбар болмай тұрып та, арамыздағы ең шын- шылымыз әрі ең абзалымыз болатынсың, – деді де Пайғамбарымызға қол берген күйі кәлима-и шәхадасын айтып, мұсылмандықты қабылдады.