Рамазан – жақсылықтың сауабы еселеніп жазылатын ай. Оразада әрбір игі амалдың сауабы еселеніп жазылады. Ардақты пайғамбарымыз Мұхаммед (оған Алланың салауаты мен сәлемі болсын) өзінің хадис-шарифінде: «Адам баласының барлық игі істерінің сауабы артады. Әрбір жақсылыққа он еседен жеті жүз есеге дейін сауап жазылады», – деп үмбетіне сүйінші хабар жеткізген болатын.

Осы мақсатта, Меркі ауданына қарасты барлық мешіт қызметкерлері қолдарынан келгенше, осы Рамазан айын тиімді пайдаланып, қайырымдылық жасауда жарысуда.

Аудан мешіттерінің ұйымдастыруымен өткен іс-шараға жалпы саны 71 адам қамтылып, күнделікті тұрмысқа қажетті ұн, сұйық май, күріш, қой еті және шекер таратылды.

Бұл игі іс-шара Рамазан айының басталуымен өз жалғасын тауып келеді. Айта кетейік, осыған дейін Меркі ауданы бойынша 280 отбасыға «Рамазан қоржыны» таратылған болатын.

Көмек алған отбасылар, осы іс-шараны ұйымдастырып жатқан имамдарға, кәсіпкер азаматтарымызға өз алғыстарын білдірді.

Меркі аудандық «Меркі ата» мешітінің баспасөз қызметі