Жамбыл ауданы Бесағаш ауылы «Бесағаш» мешітінің имамы Керимов Айтжан мешіт жамағатына арнап қасиетті Рамазан айында келетін мың айдан да қайырлы Қадір түні турасында насихат айтты.

Сұрақ-жауап форматында бүкпесіз өткен жиында жамағаттың сауалдары жауапсыз қалмады. Сонымен бірге, ауыл имамы қасиетті Қадір түнін қалай өткізу керектігін айтты. Алла Тағала Қадір түнін басқа түндермен салыстырғанда ерекшелеп, оның дәрежесін көтерген. Бұл түнде Жаратушы Иенің пенделеріне берер сыйы да мол. Раббымыз пендесіне басқа түндерде бермеген ризық-несібесін осы түнде үлестіреді.

Сол себепті, мұсылман қауымы Қадір түнін тағатсыздана күтіп, оны құр жіберіп алмауға әрі бұл түнді тиімді пайдалануға тырысады. Мұсылмандардың Қадір түнін тағатсыздана күтуінің тағы бір себебі – Жаратушыға жақындау. Себебі, Қадір түнінде тілеген дұға-тілектер сөзсіз қабыл болады.

Жамбыл аудандық мешітінің баспасөз қызметі