Әбу Умама әл-Бахили (р.а.) күндердің күнінде Пайғамбарымызға (ﷺ)дінді жаңа қабылдаған бір жігіттің келіп былай айтқандығын келтірген:

«Уа, Алла Елшісі, маған зина жасауға рұқсат берші!». Бұл сөзді естігендер үрейленіп, әлгі жігітке жақындап, оны сөгіп, ұялта бастайды. «Жап аузыңды, жап!» - деп ұрса жөнеледі.

Тек Пайғамбарымыз (ﷺ)ғана әлгі жігітке қинала қарап: «Бері алып келіңдер!» - дейді де оған: «Бері жақында!» - дейді.

Пайғамбарымыз (ﷺ)оған отыруға бұйырады. Жас жігіт отырады да екеуінің арасында мынадай әңгіме өрбиді. Алла Елшісі (ﷺ)одан: «Егер адамдардың біреуі анасымен зина жасаса, сен мұны жақсы қылық деп ойлайсың ба?» - деп сұрайды.

«Алла Тағала мені сіздің жолыңызда құрбан етсін, уа, Алла Елшісі, ешқашан жақсы демеймін», - деп жауап береді жас жігіт.

Пайғамбарымыз (ﷺ) : «Анасымен зина жасағанды басқа адамдар да жақтырмайды. Онда айтшы, сол қызбен басқа біреудің зина жасағанын қалайсың ба?».

«Жоқ, ешқашан!» - деп жауап береді жігіт.

«Ешбір адам оның қызының біреумен зина жасағанын қаламайды. Сенің қарындасыңның осындай ұятты қылыққа барғанын қалар ма едің?», - деп сұрайды Алла Елшісі (ﷺ).

«Жоқ, ешқашан!», - деп жауап береді жігіт.

«Сол сияқты басқалар да қарындастарының мұндай жаман қылыққа барғанын қаламайды. Егер сенің апайың осындай қылыққа барса, сен разы болар ма едің?», - деп сұрағанда Пайғамбар (ﷺ), жігіт: «Жоқ, ешқашан», - деп жауап береді.

«Адамдар олардың апайларының осындай жаман қылыққа барғанын қаламас еді. Сен сондай жағдайда болғың келе ме?», - деп жалғастырады сұрағын Пайғамбарымыз (ﷺ).

Оған жігіт: «Алла Тағала мені сіздің жолыңызда құрбан етсін, ешқашан, уа, Алла Елшісі», - деп жауап қайтарады.

«Бұл қылықты апайларыңның және басқа да жақындарыңның жасағанын қаламайсың, сонда осындай сорақы қылықты өзіңе қалар ма едің?», - деп қайтадан сұрайды Пайғамбарымыз (ﷺ).

Біраздан кейін Пайғамбарымыз (ﷺ)әлгі жігіттің иығына қолын қойып тұрып, келесі дұғаны айтады:

«Уа, Алла! Осы құлыңның күнәларын кешіре гөр! Оның жүрегін жамандықтан тазартып, пәк ете гөр! Оны жексұрындық атаулыдан қорғап, өз пәктігін сақтауға көмектесе гөр!»

Бұл жайтты Әбу Умама (р.а.): «Осы әңгімеден кейін әлгі жігіт пәктігін сақтап, ар-абыройын қорғап, Медине қаласының ең жақсы адамдарының бірі болған», - деп баяндаған.

Ол Жу-Лейбиб есімді 15-16-лардағы жасөспірім жігіт болатын. Ол Алла Елшісіне (ﷺ)алғысын білдірген екен. 

Бойы аласа, реңі келіңкіремеген Жу-Лейбиб көпке дейін үйлене алмай жүреді. Бірақ оны Пайғамбарымыз (ﷺ)жақсы көрген әрі ол Пайғамбарымызды (ﷺ)жақсы көрген.  Жастық албырт сезім жас сахабаны жайына қалдыра қоймайды. Алланың қалауымен, Пайғамбарымыздың (ﷺ)өзі Жу-Лейбибаға қалыңдық іздеуге кіріседі де мединелік бір ансардың қызына құда түсуге барады. Қызына Пайғамбардың (ﷺ)өзі үйленеді екен деп қалған қыздың әкесі қуанып кетеді.

Алайда істің мән-жайын біліп, үйдің иесі ұялып қыздың шешесін шақыртады, бірақ анасы Жу-Лейбиб сияқты қарапайым жігітке қызын бермейтіндігін ескертіп, қызын шақырады. Бірақ қызы жасына қарамастан сондай ақылды болатын, келіп былай сұрайды:

«Мені оған алып берейін деп жүрген кім? Егер Алла Елшісінің (ﷺ)өзі бізді бір-бірімізге хош көріп жүрсе, онда неге сіздер Пайғамбарымыздың ақылына кедергі келтіресіңдер?». Содан кейін сөзін жалғап: «Пайғамбарымыз (ﷺ)мені кімге лайық деп тапса, оны сіздер де қабылдаңыздар».

Қыздың осы сөзі кейін Құраннан орын алған:

«Алла (Т.) және Елшісі, қашан бір іске үкім берсе, Мүмін ер және Мүмін әйел үшін олардың істерінде ерікті болуларына болмайды. Сондай-ақ кім Аллаға, Елшісіне қарсы келсе, сонда рас ашық адасқан» (33:36).

Қыздарының сөзінен кейін ғана қызымызға бұдан лайық жұпты көріп тұрмағанын айтып, ата-анасы келіскен екен. 

Олардың некесі қиылған күні көп мұсылмандар қаза болған Бәдіре шайқасы орын алады. Сол көз жұмғандардың ішінде Жу-Лейбиб те болған еді. Сол күні сахабалар Жу-Лейбибтің қандай батыл да ержүрек болғанын түсінеді.  

Ақиқатында, зина жексұрын қылық болып табылады. Егер адам тыйым салғаннан тыйылып, Алладан пана іздейтін болса, Алла оны жақсылыққа жетелейді. Жу-Лейбиб (р.а.) өз үлгісімен сырт бейненің сұлулығы емес, жан сұлулығына, сондай-ақ, материалдық игілікке емес, жан байлығына ұмтылу керектігін көрсетіп кеткен сахабалардың бірі.  

asyldin.kz