Бұл тақырыпқа қатысты көптеген хадистер баршылық. Алдымен солардың бірқатарын айтып шығайық.
1. Әнас бин Малик жеткізеді (р.а.): «Саптарыңды түзеңдер, саптың түзулігі намаздың дұрыстығынан[1]».

2. Әнас бин Малик (р.а.): «Саптарды түзеңдер, мен сендерді арқамнан көріп тұрамын[2]».

3. Нұғман бин Башир риуаяты (р.а.): «Саптарыңды түзеңдер, әйтпесе Алла Тағала сендердің араларыңа алауыздық салады[3]»

4. Ибн Масғуд (р.а.): «Алла елшісі (с.ғ.с.) намазда біздің иығымызды қағып: «Түзу тұрыңдар, (сапты) бұзып тұрмаңдар, әйтпесе жүректерің бұзылады[4]», – дейтін».

5. Ибн Омар (р.а.) риуаяты: «Саптарды түзеңдер, иықтарыңды теңестіріңдер, бос орынды толтырыңдар, бауырларыңның қолдарына жұмсақ тиіңдер, шайтанда бос жай қалдырмаңдар. Кімде-кім сапты жалғаса, Алла Тағала онымен (арасын) жалғайды, ал кімде-кім сапты үзсе, Алла Тағала онымен (арасын) үзеді[5]»

Сонымен, саптың түзулігі жоғарыда айтылған хадистерді қағидаларды қамти отырып, екі мағына бойынша қолданылады.
Бірі – намазда тұрғандардың бір сызықтың бойында, бір-бірінен кейін немесе ілгері тұрмай бой түзеуі;
Екіншісі – қатарда ешбір бос орын қалдырмау.
Барлық ғұламалар бірауыздан жамағат боп оқылатын намазда саптың түзулігі бекітілген сүннет деп айтқан. Ханафи мазхабы бойынша имамның сап түзулігін қадағалауы –  міндет.
Алайда, сапты түзету жұмсақтықпен және мейіріммен жүзеге асырылады. Әсіресе, білімі аз ортада жамағатқа үйрету мен түсіндіруде ерекше жұмсақтық қажет етіледі. Өйткені, мұның барлығы намаздың мән-мағынасы Алла Тағаладан қорқу мен тақуалықтың алғышарттары екенін ұмытпаған жөн.