Адамды «шайтан» деп айтуға бола ма?

 «Шайтан» сөзінің мағынасына сай, бұл сөзбен дін ұйғарымына бой ұсынбайтындарды және шектен шыққандарды айтуға болады. Мысалы үшін, Алла Тағала Қаисетті Құранда былай айтқан:

«Осылайша, әр пайғамбарға адамдардың және жынның шайтандарынан дұшпан қылдық. Олар алдап бір-біріне жалтыраған сөздерді сыбырлайды. Раббың қаласа еді, олар оны жасамас еді. Оларды жасанды сөздерімен қойып қой» (6:112).

Бұл аятта «шайтан» сөзі - азғыру арқылы басқа адамдарды тура жолдан тайдыратын жындар мен адамдарға қатысты айтылған.

Омарды (оған Алла разы болсын) асау атқа мінуге көмектескен кезде, оның былай айтқандығы келтірілген: «Сендер мені «шайтанға отырғызып қойдыңдар», яғни шайтан деп ол асау атты айтқан.  

Сондай-ақ, Алла Елшісінің (оған Алланың салауаты мен сәлемі болсын) бірде итті және шәлкес түйені шайтан деп айтқаны келтірілген.

Жоғарыда айтылғандарды ой елегінен өткізе отырып, қыңырлық, бағынбаушылық танытатын адамды,  жынды, сондай-ақ, жануарларды шайтан деп айтуға болады.