Қоғам тыныштығы мен діни тұрақтылық – кез келген ел үшін аса маңызды құндылықтардың бірі. Дін адамды ізгілікке, бірлік пен татулыққа үндейді. Алайда кей жағдайда діннің атын жамылған түрлі жат ағымдар қоғамға іріткі салып, адамдарды тура жолдан адастыруға тырысады. Сондықтан әрбір мұсылман үшін дін мәселесінде сақ болу, дұрыс білім алып, сенімді дереккөзге сүйену аса маңызды.

Ислам діні – орта жолды ұстанатын, адамды сабырлылыққа, бейбітшілікке шақыратын дін. Пайғамбарымыз Мұхаммед (оған Алланың салауаты мен сәлемі болсын) үмбетіне дінде шектен шығудан сақтануды ескерткен. Бір хадисінде:

«Дінде шектен шығудан сақтаныңдар. Сендерден бұрынғыларды дінде шектен шығулары құртып жіберді» – деп ескерткен (Ибн Мәжа).

Жат ағымдардың негізгі мақсаты – адамдардың діни сауатсыздығын пайдаланып, оларды өз идеологиясына тарту. Мұндай топтар көбіне қоғамнан оқшаулануға, дәстүр мен мәдениеттен бас тартуға шақырып, адамдардың арасында алауыздық тудырады. Ал Ислам діні, керісінше, қоғамдағы бірлік пен татулықты сақтауды бұйырады.

Пайғамбарымыз (оған Алланың салауаты мен сәлемі болсын) мұсылмандарды әрдайым жамағатпен бірге болуға үндеген. Хадисте:

«Алланың жәрдемі жамағатпен бірге» – делінеді (Тирмизи).

Бұл хадис мұсылманның қоғамнан бөлінбей, бірлік пен ынтымақта өмір сүруінің маңыздылығын көрсетеді. Ал жат ағымдардың өкілдері керісінше, адамдарды жамағаттан бөліп, өздерінің тар түсінігіне бағындыруға тырысады.

Тағы бір хадисте Пайғамбарымыз:

«Менің үмбетім жетпіс үш топқа бөлінеді. Оның біреуі ғана тура жолда болады» – деген. Сахабалар: «Уа, Алланың елшісі, ол қайсысы?» – деп сұрағанда, Пайғамбарымыз: «Менің және сахабаларымның жолын ұстанғандар» – деп жауап берген (Тирмизи).

Бұл хадис мұсылмандарға дінді Пайғамбарымыз бен оның сахабалары ұстанған дұрыс жолмен үйрену керектігін ескертеді. Яғни дінді өз бетінше бұрмалап түсіндіретін немесе қоғамда бүлік тудыратын топтардан сақ болу қажет.

Қазақ халқы да ежелден Ислам дінін дәстүрімен сабақтастырып, бірлік пен татулықты басты құндылық ретінде ұстанған. Сондықтан халқымыз «бірлік бар жерде – тірлік бар» деп бекер айтпаған. Жат ағымдардан сақтанудың ең тиімді жолы – дұрыс діни білім алып, ата-бабамыз ұстанған дәстүрлі дінді қадірлеу.

Қорыта айтқанда, жат ағымдар қоғамды бөлшектеп, адамдарды адасушылыққа апаратын қауіпті құбылыс. Сол себепті әрбір мұсылман дінді дұрыс түсініп, сенімді ғалымдардың сөзін тыңдап, жамағатпен бірге болуға ұмтылғаны жөн. Өйткені бірлік пен тура жол – Ислам дінінің басты қағидаларының бірі.

Ержан Көшкімбай

Мойынқұм ауданының бас имамы