Рамазан айы – адамзатты мейірім мен кешірімге үндейтін, жүректерге иман нұрын себелейтін, рухани тазару мен кемелденудің ұлы мектебі. Бұл – мұсылман баласы үшін сабырдың, шүкірдің, тағат-құлшылықтың, ізгілік пен жанашырлықтың айы. Осындай қасиетті мезгілде әйел адамның орны мен рөлі айрықша мәнге ие. Өйткені әйел – отбасының шырағы, шаңырақтың ұйытқысы, ұрпақ тәрбиесінің алтын арқауы.

Ислам өркениетінде әйел затына қашанда үлкен құрмет көрсетілген. Дініміз әйелді тек отбасының мүшесі ғана емес, береке мен тәрбие бастауы, мейірім мен ізгіліктің иесі ретінде бағалайды. Ал Рамазан айында бұл қадір тіпті тереңдей түседі. Себебі әйел адам бір жағынан өз құлшылығын орындап, оразасын ұстап, жүрегін дұғамен, тілін зікірмен, жан дүниесін Құранмен нұрландырса, екінші жағынан отбасының ауызбірлігі мен үй ішінің тыныс-тіршілігін де реттеп отырады. Осы арқылы оның сабыры, төзімі, ықыласы мен жанашырлығы жарқын көрініс табады.

Рамазан – әйел үшін де үлкен рухани мүмкіндік. Бұл айда ол күнделікті тіршіліктің арасынан уақыт тауып, өз жүрегіне үңіледі, иманын күшейтеді, тәубесін жаңартады. Өмірдің сан алуан күйбеңі арасында жүріп, Аллаға жақындауға ұмтылған әйелдің әрбір ықыласты қадамы – сауапқа бастар ізгі жол. Себебі мұсылман әйелдің отбасы үшін атқарған қызметі де, егер ол Алла разылығы үшін жасалса, құлшылықтың бір бөлігіне айналады.

Әйел – тәрбие бесігінің иесі. Ана жүрегінен тараған мейірім, ана тәрбиесінен дарыған ізгілік – тұтас қоғамның болмысына әсер ететін үлкен күш. Рамазан айында ананың ауызашарға дайындығы, баласына айтқан өнегелі сөзі, отбасы мүшелерін жақсылыққа жұмылдыруы, сабыр мен шүкірді үйретуі – мұның барлығы ұлт тәрбиесіне қосылған үнсіз, бірақ өте маңызды үлес. Себебі ізгі ұрпақ ең әуелі мейірім мен тәртіп орнаған шаңырақта қалыптасады.

Қасиетті ай әйелді сабырлылыққа, қанағатшылдыққа, ұқыптылыққа және кең пейілділікке баулиды. Ораза – тек ішіп-жеуден тыйылу емес, ол – нәпсіні тәрбиелеу, ашуды жеңу, орынсыз сөзден, артық әрекеттен сақтану. Осы тұрғыдан алғанда әйел адамның отбасындағы байсалды болмысы, жұмсақ мінезі мен кешірімділігі Рамазанның шынайы рухымен үндесіп жатады. Берекелі шаңырақтың бастауында көбіне ананың сабыры мен парасаты тұратыны да сондықтан.

Дініміз әйелдің табиғи болмысы мен өмірлік жағдайын да назардан тыс қалдырмайды. Ислам – мейірім мен әділет діні. Сондықтан жүкті, емізулі баласы бар немесе денсаулығына зиян келуі мүмкін әйелдерге шариғат жеңілдік қарастырған. Бұл – Исламның адам мүмкіндігін ескеретін, қиындықты емес, жеңілдікті қалайтын кемел дін екенін айқын аңғартады. Мұндай қамқорлық әйел мәртебесінің дінімізде қаншалықты жоғары екенін көрсетеді.

Бүгінгі қоғамда Рамазан айында әйелге түсетін тұрмыстық жүктің кейде көбейіп кететіні жасырын емес. Дегенмен қасиетті айдың қадірі дастарқанның молдығымен ғана өлшенбейді. Рамазанның шынайы мәні – жүректің тазалығында, ықыластың беріктігінде, отбасыдағы татулық пен рухани үндестікте. Сондықтан отбасы мүшелері әйелдің еңбегін бағалап, оған қолдау білдіріп, қасиетті айдың берекесін бірге сезінуге ұмтылғаны абзал. Бұл – отбасы мәдениетінің де, мұсылмандық әдептің де көрінісі.

Рамазан және әйел ұғымы – бір-бірімен терең сабақтас ұғымдар. Өйткені әйел бар жерде мейірім бар, тәрбие бар, береке бар. Ал Рамазан – сол мейірімді еселеп, сол тәрбиені тереңдетіп, сол берекені арттыратын ай. Әйел адамның осы айдағы ықыласы мен еңбегі, сабыры мен шүкірі, құлшылығы мен қамқорлығы – қоғамның рухани өзегін бекемдей түсетін асыл құндылықтар.

Қорыта айтқанда, Рамазан айы әйелдің тек отбасы шеңберіндегі рөлін ғана емес, оның рухани болмысын, тәрбиелік миссиясын, адамгершілік келбетін айқындайтын ерекше кезең. Әйел – шаңырақтың шуағы ғана емес, ұлттың ұяты, ұрпақтың тәрбиешісі, ізгіліктің үнсіз жаршысы. Ендеше, қасиетті Рамазан айында мұсылман әйелдерінің еңбегі мен ықыласына құрметпен қарап, олардың отбасы мен қоғам өміріндегі орнын лайықты бағалау – баршамыздың ортақ міндетіміз.

Алла Тағала барша аналар мен арулардың ұстаған оразасын, еткен дұға-тілектерін, жасаған ізгі амалдарын қабыл етіп, шаңырақтарына амандық, жүректеріне иман, өмірлеріне береке нәсіп етсін.

Әмин.

Жайна Бекназарова

Жамбыл аудандық "Бәйдібек" мешітінің ДСАК ұстазы