Адам баласы өмірінде ең көп ойланатын нәрсенің бірі – ризық, яғни несібесі. «Ертеңгі күнде не жеймін, қалай өмір сүремін, балаларымды қалай асыраймын?» деген ой әрбір жанды мазалайды. Бірақ мұсылман адам білуі керек: ризық – тек біздің қолымызда емес, ол – Алланың кепілді несібесі.

Құранда Алла Тағала:

«Жер жүзінде жүрген әрбір жан иесінің ризық-несібесін Алла мойнына алған» (Һуд сүресі, 6-аят) – деп баяндайды. Бұл аятта әрбір тіршілік иесінің несібесі алдын ала жазылып қойылғандығы анық айтылған.

Пайғамбарымыз ﷺ бір хадисінде:

«Ризық сендерді іздейді, қалай ажал іздегендей» – деген. Яғни, қалай ажал адамды ешқашан айналып өтпесе, ризық та солай адамға жетпей қалмайды.

Алайда бұл «адам еңбексіз жата беруі керек» деген сөз емес. Исламда адал еңбек – үлкен сауап. Алла Тағала Құранда таразыны әділ толтыруды, өлшегенде кемітпеуді бұйырады. Демек, адал табыс – ризықтың берекесін арттырады, ал харам табыс – қолдағы бардан да айырады.

Ризықтың берекесін сақтаудың жолдары да бар:
- Шүкіршілік – азды көп қылады;
- Садақа – бәле-қазаны қайтарады, ризықтың жолын ашады;
- Адал еңбек – ең үлкен табыс көзі;
- Тәуекел – жүрекке тыныштық сыйлайды.

Шын мәнінде, ризық тек ас-су мен дүние-мүлік емес. Адамның денсаулығы, уақыты, отбасының амандығы, ілімге қол жеткізуі, тіпті жүрегіндегі тыныштығы да – Раббымыздың берген ерекше сыйы.

Сондықтан әрбір мұсылман қолындағы барға шүкір етіп, адал еңбекке ұмтылып, Алладан береке тілеуі тиіс. Сонда ғана дүниеміз де, ахиретіміз де баянды болады.

Нұрдос Нұрғазыұлы

«Шалғынбайұлы Бейсенбай» мешітінің Имамы