Сәду Шәкіров ауылындағы "Байтоқты баба" мешітінде ұлттық құндылықтарды ұлықтау мақсатында ашылған "Дін мен дәстүр" бұрышында танымдық насихат жалғасуда. Аталмыш мешіттің имамы Бақдәулет Оспанов жамағатқа тақия киюдің мәні мен шариғаттағы орны туралы тағылымды уағыз айтты.

Имамның айтуынша, тақия – тек бас киім ғана емес, мұсылман ер азаматтың имани рәмізі, әдеп пен тәрбие белгісі. Исламда тақия кию – сүннет амалдарының бірі. Сондай-ақ бұл – ата-бабамыздан мирас болып қалған рухани-мәдени мұра. Жамағатқа ұлттық киімнің осы бір қарапайым үлгісі арқылы имандылық пен әдептілік туралы ой тасталды.

Мешіт жанынан ашылған бұл бұрыш – халқымыздың дәстүрі мен дінінің өзара сабақтастығын насихаттап, жастардың рухани көзқарасын нығайтуды көздейді. Мұндай игі бастамалар ұлттық құндылықтарымызды жаңғыртып, ұлт болмысын ұлықтайтыны анық.

"Байтоқты баба" мешітінің баспасөз қызметі.