Әнас ибн Маликтің (родиял-лаһу ғанһу) хадисінде Құранның алты қариы жайында айтылған: Убай ибн Кағб, Муғаз ибн Жәбәл, Зайд ибн Сәбит, Әбу Дарда, Сағд ибн Ғубада, Әбу Зайд (родиял-лаһу ғанһум).

Сонымен қатар Имам Бухари (рохматуллаһи ғаләйһи) «Құранның құндылықтары» кітабында Құранды кімнен үйрену керектігін айтқан. Расулуллаһ (солләл-лаһу ғаләйһи уә салләм) төрт адамның есімін атаған. Ол: Муғаз ибн Жәбәл, Убай ибн Кағб, Сәлим Маулә Әбу Хузайфа, Абдуллаһ ибн Масғуд (родиял-лаһу ғанһум). Сонымен қатар Расулуллаһ (солләл-лаһу ғаләйһи уә салләм) қариалардың қатарында бір әйелді атап көрсеткен. Ол – Умму Уарақа (родиял-лаһу ғанһа).

Дегенмен, қарилардың саны бұл аталғанмен шектелмейді. Имам Ибн Хажәр Ғасқаләнидің (рохматуллаһи ғаләйһи) айтуынша қарилардың қатарына Әбу Бәкр, Омар, Али, Талха, Сағд, Ибн Масғуд, Хузайфа, Сәлим, Әбу Хурайра, Абдуллаһ ибн Саиб (родиял-лаһу ғанһум) жатады. Қари әйелдердің қатарында Айша және Умму Саләма да (родиял-лаһу ғанһума) аталып көрсетілген. Сонымен қатар имам Әбу Дауд (рохматуллаһи ғаләйһи) осы аталғандардың қатарына муһажирлер: Тәмим ибн Ауса Ад-Дари мен Ғуқба ибн Әмирді, ансарлар: Ғубада ибн Сомит, Муғаз Әбу Хуләйм, Мужәмми ибн Жәри, Фудәл ибн Ғубайда, Масләм ибн Махледи т.б. қосқан. Әбу Муса Әл-Ашғари, Ғамр ибн Әл-Ғас және Сағд ибн Убаба Пайғамбарымыз (солләл-лаһу ғаләйһи уә салләм) дүние өткеннен кейін қари атанған.

qari.kz