Ережеп айының құрметіне орай Батыс Қазақстан облысының бас имамы Самат Қанатқалиұлының ұйымдастыруымен мешіт ақсақалдарына арнайы дастарқан жайылды.

Құлшылық ордасының қызметкерлері қарияларға құрмет көрсетіп, батасын алды. Бас имам Самат Қанатқалиұлы ақсақалдарға арнайы сыйлықтар тарту етіп, құттықтау лебізін білдіріп, дініміздегі және дәстүріміздегі үлкендерді құрметтеудің сауабы мен әдебі турасында насихат айтты. Ақ дастарқан басына жиналған қазыналы қарттар да өздерінің өнегелі әңгімелерін өрбітіп, тағылымға толы насихаттары мен ізгі ойларын ортаға салды.