Санкт-Петербург қаласындағы Орталық мешіттің қираған мұнаралары қалпына келтіріліп, қайта тұрғызылды. Бір жылдан астам уақытқа созылған құрылыс жұмыстары осы апта ішінде аяқталып, мұнаралардың жарық шамдары да орнатылып болған. Ендігі жөндеу жұмыстары ғимараттың үлкен залына жүргізілмек.

Айта кетейік, 2013-жылы мешіт мұнаралары құлап түскен болатын. Мамандардың мәлімдемесіне сәйкес, ғимараттың құлауына ауа-райының қолайсыздығы әсер еткен. Сондай-ақ, сорғалаған судың гранит блоктардың ажырауына әкеліп соққаны айтылған еді.

Құрылыс жұмыстарына жұмсалған 50 млн рубль көлеміндегі қаржы түгелдей үкімет қазынасынан бөлінген. Өйткені, Санкт-Петурбург Орталық мешіті аймақтық маңызы бар сәулет ескерткіші болып табылады. Мешітке жыл сайын жүргізіліп келе жатқан жөндеу жұмыстары осы уақытқа дейін жамағат көмегімен жүзеге асып келген болатын. Келесі жылы құлшылық ордасына түгелдей жөндеу жұмыстары жүргізіліп, барлық шығын үкімет қазынасынан төленетін болып бекітілді.