Әлемнің жеті кереметінің бірі, әйгілі Тәж-Махал кесенесі әу баста индустардың сыйынатын құдайы Шиваға арналып салынған ғибадатхана болыпты-мыс. Тек уақыт өте келе мұсылмандар оны өздеріне меншіктеп алған.

Осылай деп мәлімдеме жасаған Агра қаласының алты заңгері былтырғы жылы Тәж-Махал кесенесін индустар храмы деп жариялауды талап етіп, сотқа арыз берген болатын. Сот олардың талаптарын негізсіз деп тауып, Тәж-Махал кесенесін мұсылман әміршісі Шах Джаханның салдырғаны тарихи ақиқат екенін мәлімдеді.

Үндістанның мәдениет министрі Махеш Шарманың айтуынша, кесенеге жүргізілген зерттеулер барысында Тәж-Махалдың индустар ғибадатханасы ретінде пайдаланылғанын дәлелдейтін ешбір айғақ табылмаған.

Айта кетейік, Тәж-Махал кесенесін XVII ғасырда өмір сүрген мұсылман әміршісі Шах Джахан өзінің 14-ші сәбиіне босанар кезінде көз жұмған Мумтаз есімді әйеліне арнап салдырған.  Кейін сүйікті әйелінің қасына Шах Джаханның мүрдесі қойылған.

1983-жылы ЮНЕСКО-ның әлемдік жәдігерлер тізіміне енген Тәж-Махал кесенесін көруге күн сайын мыңдаған адам келеді.