30 Қараша 2024
28 Джумада-авваль 1446
ҚР МСМ Дін істері комитеті Дін мәселелері жөніндегі ғылыми-зерттеу және талдау орталығы мен Қазақстан мұсылмандары діни басқармасының бірлесе ұйымдастыруымен өтіп жатқан «Зайырлы мемлекет және дін қатынастары дәстүрлі рухани құндылықтар аясында» атты семинар бүгін өз жұмысын аяқтады. Екі күнге созылған семинар барысында ҚМДБ құрамындағы діни сауат ашу курстары мен діни білім беру мекемелерінің ұстаздары мен қоғамдық ұйым жетекшілері мен мүшелеріне елімізге белгілі дінтанушы ғалымдар, сарапшы мамандар дәріс өткізді.
Сондай-ақ, Дін істері комитетінің мамандары дайындаған түрлі тақырыптағы баяндамалар мен сараптамалардың семинарға қатысушылар үшін маңызды ақпарат болғаны сөзсіз. Атап айтқанда, «Тыйым салынған ұйымдар қызметінің ерекшеліктері, идеологиясы, еліктіру әдістері мен жұмыс тәсілдері», «Қазақстан аумағындағы дәстүрлі емес діни бірлестіктер», «Діни білім берудің тәжірибелік мәселелері» тақырыбында жасалған баяндамалар қатысушылар үшін орны ерекше болды.
Бүгін, семинардың 2-ші күні Жоғарғы оқу орындары жанынан құрылған «Қыз Жібек» клубының таныстырылымы болып өтті. Сондай-ақ, Орта Азия мұсылман әйелдерінің ІІ форумына дайындық мәселелері талқыланды.
Семинар соңында қатысушыларға ҚМДБ-ның төраға орынбасары, «Әзірет Сұлтан» мешітінің Бас имамы Серікбай қажы Сатыбалдыұлы сертификат табыстады.
