Жамбыл облысы Байзақ ауданының бас имамы Қанат Әділханұлы Көктал ауылдық «Әбу Бәкір Сыддық» мешітінің жаңа ғимаратының кірпішін қалау рәсіміне қатысты.

Шара аясында Қанат Әділханұлы: «Бұл өмірге келген әрбір пенде өзінің артынан өшпес мұра немесе өшпес із қалдырып кетсем деп армандайды. Оған жетер жол Ислам шариғатында жатыр. Соның бірі – имам Мүслимнен келген хадисте кездеседі. Пайғамбарымыз Мұхаммед (оған Алланың салауаты мен сәлемі болсын.): «Алла Тағалаға қаланың өте жақсы орындары – мешіттері. Ал, қаланың өте жаман орындары – базарлары», – дейді.

Мешіт – мұсылманның Жаратушысына құлшылық жасап, тәубеге келер, жанына жара салған хакім Абай айтқандай «қияметшіл дүниенің» кірінен тазарып, бар арман, үмітінің ақталуын тілеп, дұға жасайтын қадірлі үйі. Ал, мешіттің қабырғасынан  діни уағыз тыңдап, білімін жетілдіріп, сауатымды арттырамын, ұстаздан тәлім аламын деген мұсылмандар үшін – тәрбие ордасы», - деп жиналған халыққа «Мешіт салудың сауабы» тақырыбында насихат айтты.