Қонаев ауылдық мәдение үйінде мектеп оқушыларымен кездесу жасалды. Шараға "Қонаев" мешітінің имамы Құлыбек Ердаулет қатысып, "Имандылық, рухани тәрбие" тақырыбы аясында насихат айтты. 

"Исламның асыл құндылықтарын темірқазық еткен дана бабаларымыз да адамның имандылығына, кісілік қасиеттеріне ерекше көңіл бөлген. Адамның жарық дүниеге келуі, өсуі, ержетуі, тіршілік етуі, қартаюы, ата мен баланың қарым-қатынасы, үлкенді-кішілі сыйластық, әдептілік пен арлылық, инабаттылық тәрізді қасиеттер имандылықтың маңызды құрамдас бөлігі ретінде назардан тыс қалмаған. Қоғамда берік қалыптасқан осындай көргенділікпен өмір кешу дағдылары жинала келіп, барша адамгершілік қағидалардың жазылмаған заңдылығына айналған. Бойында асыл қасиеттері бар жасты «тәрбиелі» деп, жүрегінен нұр, өңінен жылу кетпейтін, әрдайым жақсылықты ойлайтын адамды «иманды» деп атаған" - деп имам имандылықтың маңызын, қоғамдағы пайдасын, имамды адамның мінез-құлқы туралы атап өтті. 

Шу аудандық "Жәми" мешітінің баспасөз қызметі