«Пайғамбарымыз (Алланың оған салауаты мен сәлемі болсын) бір хадисінде:«Мұсылман басқа бір мұсылманға тілімен де, қолымен де зиян келтірмейді,» – деген.

Діннің осындай ең қарапайым қағидаларынан хабарсыз адам кім үшін, не үшін соғысып жүргенін білмейтін дәрежеге жетті. Ислам діні – бейбітшілік, амандық деген ұғымдарды білдіреді. Алла Тағаланың өзінің соңғы елшісін жіберудегі мақсаты қасиетті Құранның «Әнбия» сүресінің 107-аятында былайша баяндалады: «Біз сені әлемдерге тек рақым етіп қана жібердік», – деген», – деп атап өтті бас мүфти Ержан қажы Малғажыұлы.

Халықаралық форумда Ислам ғалымдары мұсылман өркениеті мен Орта Азия халқына ортақ дәстүрлі діннің мәртебесін көтеріп, қоғамда тыныштық орнату жөніндегі өз ой-пікірлерін ортаға салады. Сондай-ақ,  жалпыға ортақ адамгершілік құндылықтарды насихаттап, ортақ мәдени мұралар мен ел руханиятын қайта жаңғырту мәселелерін талқыламақ.