Халықаралық Олимпиада комитетінің мүшесі Астрид Якобсен Париж Олимпиадасына қатысатын спортшылар хиджаб кие ала ма деген сұраққа жауап берді, деп жазады ТАСС Sport. Спортшылар Олимпиада ауылында хиджаб пен басқа да діни рәміздерді шектеусіз кие алады, ал олардың жарыстарда қолданылуын халықаралық федерациялар реттейді, деді ол.

«ХОК және ХОК Атлеттер комиссиясы атынан Олимпиада қалашығында хиджаб немесе басқа діни рәміздерді киюге ешқандай шектеулер болмайтынын хабарлау мен үшін өте маңызды. Жарыстарға келетін болсақ, оларды өткізу кезінде нақты халықаралық федерацияның ережелері қолданылады», - деді ол. «Ойындар Францияда өтетіндіктен, француз спортшылары жергілікті заңдарға бағынады және ХОК бұл жағдайды анықтау үшін Франция билігімен және Ұлттық Олимпиада комитетімен тығыз жұмыс істейді. ХОК ережелері Олимпиада ойындарында барлығына қатысты болуы маңызды», - деді Якобсен.

Бұған дейін Францияның спорт министрі Амели Удеа-Кастера француз спортшыларына Олимпиада ойындарында хиджаб киюге тыйым салынатынын айтқан болатын. Париждегі Олимпиада ойындары 26 шілде мен 16 тамыз аралығында өтеді. Жарысқа Ресей мен Беларусь спортшылары қатыса ала ма, жоқ па, әзірге белгісіз. ХОК оларға бейтарап мәртебеде Олимпиадаға қатысуға рұқсат беруді ұсынды.