Бүгін Бас мүфти Наурызбай қажы Тағанұлы Қостанай өңіріне жұмыс сапарында Меңдіқара ауданы орталығында жаңадан ашылған «Қарамақы ата» мешітінде жұма уағызын айтты.

«Сыйласаң, сыйын көресің» тақырыбында уағыз айтқан ҚМДБ Төрағасы: «Асыл дініміз Ислам өзге адамдарды құрметтеп-сыйлауға, олармен ең көркем қарым-қатынаста болуға шақырады. Алла Тағала қасиетті Құранның «Ниса» сүресінің 36-аятында: «Аллаға құлшылық жасаңдар. Оған ешнәрсені ортақ қоспаңдар. Ата-анаға, жақындарға, жетімдерге, міскіндерге, жақын көршіге, бөгде көршіге, жан жолдасқа, жолда қалғандарға және қол астындағыларға жақсылық жасаңдар», – деп бұйырады.

Адамдарды құрметтеу, оларды сыйлау ­­– мұсылманның өзге адамдармен қарым-қатынасындағы басты ұстанымы. Ардақты Пайғамбарымыз (оған Алланың салауаты мен сәлемі болсын): «Кім кішімізге мейірімділік танытпаса, үлкеніміздің қадірін білмесе, онда ол бізден емес», – деп жасы үлкенді де, жасы кіші адамды да сыйлап, құрмет көрсетуге шақырған (имам Тирмизи). Қазақ халқында да сыйластықтың орны өте үлкен. Ата-бабаларымыз: «Адам сыйлағанның құлы», «Сыйлап берген су тәтті» деп, сыйластық атаулыға аса мән берген» деді.

Бас мүфти жұма намазынан кейін мешіт жамағатымен бірге ел амандығы мен тыныштығы үшін дұға жасады.