Осылайша Қырғыз еліндегі халал өндірісі табысты әрі тез дамушы салаға айналып келеді. Дегенмен, адал сөзін өз мақсат-пиғылдарына пайдаланушы «күмәнді» өндіріс орындары да азаймай отыр. Олар халал стандартына сәйкеспейтін өз өнімдерін «Халал» белгісімен сатып, тұтынушылардың санасын сарсаңға салды. Осы келеңсіздіктерді реттеу мақсатында Қырғызстан Экономика министрлігі халал өндірісі мәселесін қолға алды.

Аталмыш министрліктің Техникалық реттеу және метрология басқармасы халал өндірісі секторының меңгерушісі Алмаз Қайырбековтың айтуынша, бұдан былай мемлекет өндіріс орындарына халал сертификатын беруде қатаң талаптар қояды. Экономикалық ведомства өкілі бекітілген нормалар қырғыз азаматтарына экологиялық таза халал өнімін беруге кепіл болатынын жеткізді.

«Біз осы тұжырымдаманы әзірлеу барысында бүгінгі қоғамның халал өнімдерін мемлекет тарапынан бақыланғанын қажет ететініне көз жеткіздік. Алайда, бұл ретте зайырлы қоғам қағидаларын да сақтауымыз керек. Ал негізгі тұжырымдама халал стандартына сай өнімдерге берілетін талаптарды айқындап, мұсылман қауымының талап-тілектеріне жауап бермек» деп түсіндірді ол.

А.Қайырбеков аталмыш тұжырымдаманың бүгінде дайындалып біткенін, ол бір жыл ішінде өз нәтижелерін беретінін де атап өтті.