Әлемде мұнай мен газ бағасы құбылып тұрған қазіргі уақытта Иордания корольдігі балама энергия көздерін пайдалану жолдарына білек сыбана кірісті.
Коммуналдық қажеттіліктер үшін Күн энергиясын өндіру жөнінен араб әлемі көшбасшыларының бірі болып отырған корольдік жуық арада Иорданияның барлық мешіті Күн энергиясымен жұмыс істейтінін мәлімдеді.
Елдегі Балама энергия департаментінің өкілі Ахмет Әбу Сааның сөзінше, осы жылы барлық мешіттерді энегрияны генерациялау үшін фотоэлектрлік гелиожүйелермен жабдықтау жұмыстары жүргізілмек. Атап айтқанда, Уақып және Ислам істері министрлігімен ынтымақтаса іске асырылатын жоба барысында елдегі 6 мыңдай мешіттің шатырына күн панельдері орнатылады.
Иорданияда жылына 150-дей мешіт ашылады екен. Оларға да бірден Күн панельдерін орнату көзделуде.