Мадридтік «Реал» клубының шабуылшысы Криштиану Роналду Непалдағы жер сілкінісінен зардап шеккендерге 7 млн. еуро  бөлді.

Mirror басылымының жазуынша, 2014 жылы табысы ең жоғары болған футболшы Роналду Непалдағы зілзаладан зардап шеккен отбасыларға көмек ретінде Save the Children қайырымдылық қорына өз есепшотынан 7 млн. еуро аударған.

Сондай-ақ ол әлеуметтік желі  арқылы өзінің жанкүйерлерін қайырымдылықпен айналысуға, табиғат апатынының кесірінен үй-күйсіз қалған жандарға қол ұшын созуға шақырды, деп жазады шетелдік БАҚ.

Айта кетейік, Непалда тербелісі 7,9 баллға жеткен жойқын зілзала 25 сәуір күні таңертең болды. Соңғы мәліметтер бойынша құрбандар саны 8019 адамға жетті, ал 17 876 адам жарақаттанып, 366 адам із-түзсіз жоғалғандардың қатарында.

inform.kz