Қазақстан мұсылмандары діни басқармасының ұйымдастыруымен Құран Кәрімді жатқа оқудан қыздар арасында ІІ республикалық байқау өтеді.

Алла Тағала Құран Кәрімде игілікте жарысуды бұйырған болатын. Яғни Алланың кәламын жаттау мен оқу арқылы жарысуға үндеді. Хақ Тағаланың осы үндеуін орындау мақсатында, Қазақстан мұсылмандары діни басқармасы 2016 жылы Алматы қаласында Құранды жатқа оқудан қыздар арасында тұңғыш республикалық байқау өткізген болатын. Енді міне, екінші байқау 9-10 наурыз аралығында ел астанасы Нұр-Сұлтан қаласында өткізіледі.

Қыздар арасында Құран Кәрімді жатқа оқудан ІІ республикалық байқау қарилардың Құран Кәрімді оқу және жаттау деңгейін көтеру, өзара тәжірибе алмасу, мұсылман жамағатының құрани сауатын көтеру арқылы қоғамның руханиятын арттыру мақсатында ұйымдастырылып отыр. Жарысқа қатысушы қыздар Құранның 30, 20, 10 және 5 пара номинациялары бойынша бақ сынай алады. Үміткердің құжаттары 2022 жылдың 21 ақпанына дейін қабылданады.

Үміткер қыздарға қойылатын талаптар:

– үміткердің Қазақстанның азаматы болуы міндетті;

– үміткердің жасы 30-дан аспаған болуы қажет;

– үміткер бір номинацияға ғана қатыса алады;

– әр номинацияда талап етілетін параларды толық жаттауы тиіс;

– жарысқа қатысушының жаттаған паралары толық болуы керек, яғни екі жерден жарты-жарты параны біріктіріп ұсынуға болмайды;

– жарысқа қатысу құжаттарын ұйымдастырушылар белгілеген мерзімде тапсыруы керек;

– үміткер өз облысындағы ҚМДБ өкілдігінің жолдамасымен келуі шарт;

– әр облыстан бір номинацияға бір үміткер ұсынылады (барлығы 4 үміткер);

– Құранды жатқа оқу номинациясы бойынша республикалық жарыстардың жүлдегерлері жарысқа қатыса алмайды.

Үміткер қыздардан талап етілетін құжаттар:

– анкета (бекітілген үлгі бойынша);

– жеке куәлік (паспорт) көшірмесі;

– ҚМДБ-ның өңірдегі бас имамының ұсыныс хаты (жолдамасы).

Байқаудың номинациялары:

1. Құранды толық жатқа оқу

1-орын (1 300 000 теңге)

2-орын (1 000 000 теңге)

3-орын (700 000 теңге)

2. Құранның 20 парасын жатқа оқу

1-орын (800 000 теңге)

2-орын (600 000 теңге)

3-орын (500 000 теңге)

3. Құранның 10 парасын жатқа оқу

1-орын (500 000 теңге)

2-орын (300 000 теңге)

3-орын (200 000 теңге)

4. Құранның 5 парасын жатқа оқу

1-орын (300 000 теңге)

2-орын (200 000 теңге)

3-орын (100 000 теңге)

Жалпы жүлде қоры: 6 500 000 теңге

Ұйымдастырушылар:

Қазақстан мұсылмандары діни басқармасы;

ҚМДБ Нұр-Сұлтан қалалық өкілдігі;

ҚМДБ-ның облыстардағы өкілдіктері.

Қосымша сұрақтар үшін:

Жәнділлә Мамытханұлы (+7 701 477 07 17)