Ислам діні тазалыққа ерекше мән берген. Қасиетті Құранда: «Сөзсіз, Аллаһ тәубе еткендер мен тазаланғандарды сүйеді»(Бақара, 222) – деп, тазалықтың Алланың сүйіспеншілігіне лайық іс екені айтылған. Пайғамбарымыз (с.ғ.с.) да тазалықтың маңыздылығы жайлы: «Тазалық – иманның жартысы», «Аллаһ тазалықты жақсы көреді»(Тирмизи. Сунән. Египет. 1937. Әдеб, 41) - деген. Медресенің шәкірттерін тазалыққа, мешітті таза ұстауға баулу мақсатында «ҺибатуллаТарази» медресесінің директоры, ҚМДБ-ның ЖО бойынша өкіл имамы Данияр қары Жұмабаевтың жетекешілігімен мешіт – медресенің ауласында тазалық шарасы өтті.
Қоршаған ортаның тазалығына мән беріп, көңіл аудару әрбір мұсылман баласының бұлтартпас борышы болып саналады. «Жұмыла көтерген жүк жеңіл» дегендей мешіт – медреседе өткен игі шараға қала тұрғындары да атсалысты. Тазалық шарасына қатысушылар мешіт – медресенің айналасын тазалап, орындықтарын жөндеп, әктеп-сырлап, ауланы арам шөптерден арылтып, қоқыстардан тазартты. Бұл игі шара, аула-атыздардың ретке келуімен қатар, тазалық ісіне жол ашса, сонымен қатар, қоршаған ортаның көктеп, көгеруіне де мол септігін тигізетіні сөзсіз.
Көгедай Шәмерхан