Жамбыл облысы Байзақ аудандық «Байзақ баба» мешітінің наиб имамы Бақытбек Бауыржанұлы Сарыкемер ауылында орналасқан «Себет-Корзинка» сауда орталығы қызметкерлеріне «Ауызбіршіліктің пайдасы» тақырыбында насихат айтты. Наиб имам өз сөзінде: «Алла Тағала мұсылман баласына: «Бөлінбеңдер ...» («Әли Имран» сүресі, 103-аят) – деп, бауырмал болуға бұйырған. Мұсылман баласы көркем мінез-құлықпен ел ішіндегі ауызбіршілікті сақтай білуі керек. Себебі, рухани тұрғыда өсіп-жетілген тұлға қандай жағдайда да барлық мәселені байыпты жолмен шешеді. Алла Тағала: «Жақсылыққа пен тақуалыққа өз-ара бір-біріңе жәрдемдесіңдер. Күнәға және дұшпандыққа біріңе бірің жәрдемдеспеңдер...» («Мәида» сүресі, 2-аят) деп бұйырған.

Мұхаммед пайғамбарымыз (Оған Алланың салауаты мен сәлемі болсын): «Ауызбіршілікте – Алланың мейірімі, бөлінуде –қаһары бар» (Имам Ахмад) деп, ынтымақ пен бірліктің мәнін ашып көрсеткен. Алаш ардақтысы Әлихан Бөкейхан: «Қазақ баласы бірігіп, тізе қосып іс қылса, халықтық мақсат сонда орындалады. Бостандыққа апаратын жалғыз жол – ұлттық ынтымақ қана» деп бұқараны бірлікке шақырған.