"Һибатулла Тарази" медресе-колледжі мен еліміздегі барлық оқу орындарын жаңа оқу жылымен, барлық ұстаздарды 1 қыркүйек - білім күнімен құттықтаймын!

Шариғат тілінде білім сөзі – бір мәселені жан-жақты, анық-қанығына дейін жіті түсіну деген мағынаны білдіреді. Білім – ақылдылық пен парасаттылықтың белгісі.

 Пағамбарымыз (с.ғ.с.) хадис шәріпінде: «Білім алу – әрбір мұсылман ер мен әйелге парыз, – делінсе, тағы бір хадисінде: «Тал бесіктен жер бесікке дейін білім үйрен», – деп насихат айтылған.

Қасиетті Құранның алғашқы түскен аяты білім алуға шақырды. «Иқра!» (Оқы!) деп басталған сөз «оқу мен жазуды игер» деген мағынаны береді. Тарихта мұсылмандардың әрбір жас-кәрісі, ер-әйелі білімнің тал бесіктен жер бесікке дейін парыздығын сезінді. Қасиетті Құран мен сүннет тағылымдарына сүйеніп өмір сүрген мұсылмандар білім мен ғылымды негізге алып, ғаламға шуақ нұрын төкті. Нәтижесінде,  ислам дінінің қанаты жеткен өлкелерде ғылым, білім, мәдениет дамып, ғылымның әр саласынан есімі өшпейтіндей танымал ғалым-ғұламалар жетілді.

Міне, осындай үлкен білім жолындағы барша шәкірттерге, мамандарға Алланың нұры жаусын! Жаратқан Жаппар имеміз дініне, еліне адал қызмет жасайтын ұл-қыздардың шығуын нәсіп еткей! Әмин!

Бейбіт МЫРЗАГЕЛДИЕВ 

ҚМДБ-ның Жамбыл облысы бойынша бас имамы