Канададағы Онтарио университетінің студент қыздары мұсылман мәдениетін насихаттау әрі омырау обырымен сырқаттанатын ауруларға қаржы-қаражат жинау мақсатында «Қызғылт шариғат шәлісі» деп аталатын ағартушылық бағытта акция өткізді.

«Бұл - шариғат шәлісінен хабары жоқ адамдардың оның не екенін білуіне мүмкіндік беретін шара»,- деді мұсылман студенттер қауымдастығының (LU-MSA) вице-президенті Лейкхед Кэтлин Коннертон The Argus атты ақпарат көзіне берген сұхбатында.

«Шариғат шәлісі мұсылман қыз-келіншектердің киімі ғана емес, сонымен қатар, өмір сүру салты да. Біз шариғат шәлісіне қатысты қалыптасқан жаңсақ ұғымға тойтарыс береміз»,- деді ол.

Аталмыш акцияға қатысқан бойжеткендер бірыңғай қызғылт түсті шариғат шәлісін жамылып, омырау обырымен сырқаттанатын әйелдерге қаржылай қолдау көрсетіп, жәрдемдесу үшін өздері үйден дайындап әкелген тәтті тағамдарды сатты.

Қазан айында мұсылман студенттер қауымдастығы қайырымдылық апталығын өткізіп, балалар үйінің және көп балалы отбасылардың мұқтаждығына қаржы жинады.

Осынау ұйымның президенті Захида Хасан қыс мезігілінде асыл дініміз бен мұсылмандар жайлы ағартушылық бағытта тағы бір шара өткізуді жоспарлап отырғанын жеткізді.

muslim.kz