Рим Папасы Францисктің Біріккен араб әмірлігіне сапарының қорытынды жиынында «Авраамдық діндер үйі» салынатыны мәлім болды. Бұл туралы Абу-Дабидің  мұрагер ханзадасы шейх Мұхаммед бен Заид әл-Нахайян өзінің Twitter микроблогында жариялады.

Ерекше діни ғимарат Абу-Дабидің Саадият аралында бой көтермек. Ол «ұлттық және діни ұстанымына қарамастан әмірлікте өмір сүріп жатқан барлық қауымдастықтардың адами бауырластық және бейбіт қарым-қатынасын бейнелейтін ерекше діни ғимарат» болмақ.

Еске сала кетсек, Рим Папасының БАӘ-ге сапары 3-5 ақпан аралығында өтті. Іссапардың маңызды нәтижелерінің бірі «әл-Әзһар» университетінің басшысы шейх Ахмад ат-Тайибпен антитеррористік хартияға қол қою болды. Сонымен қатар понтифик Абу-Дабидің Zayed Sports City Stadium стадионында жұртшылықпен кездесу өткізді.